ಮುಖಪುಟ /ನಮ್ಮದೇವಾಲಯಗಳು  

ಬೆಂಗಳೂರಿನ ಬನಶಂಕರಿ ದೇವಾಲಯ

*ಟಿ.ಎಂ.ಸತೀಶ್

ಕನ್ನಡರತ್ನ.ಕಾಂ, kannadaratna.com,  bangalore_banashankaritemple, ಬೆಂಗಳೂರು ಬನಶಂಕರಿ ದೇವಾಲಯಬೆಂಗಳೂರಿನಿಂದ ಕನಕಪುರಕ್ಕೆ ಹೋಗುವ ರಸ್ತೆಯಲ್ಲಿ ಕುಮಾರಸ್ವಾಮಿ ಲೇಔಟ್ ಕಡೆಗೆ ತಿರುಗುವ ರಸ್ತೆಯ ಅಂಚಿನಲ್ಲಿ ಇರುವ ಭವ್ಯ ದೇವಾಲಯವೇ ಬನಶಂಕರಿ ದೇವಾಲಯ. ಈ ದೇವಾಲಯವನ್ನು ಸರೇಬಂಡೆ ಪಾಳ್ಯದ ಕುಟುಂಬಕ್ಕೆ ಸೇರಿದ ಬಸಪ್ಪಶೆಟ್ಟರು ನಿರ್ಮಿಸಿದರೆಂದು ತಿಳಿದುಬರುತ್ತದೆ.

ಕನಕಪುರ ಬೆಂಗಳೂರು ಮುಖ್ಯರಸ್ತೆಯಲ್ಲೇ ಇರುವ ಈ ದೇವಾಲಯಕ್ಕೆ ಭವ್ಯವಾದ ಪ್ರವೇಶ ಗೋಪುರವಿದೆ. ಗೋಪುರ ಪ್ರವೇಶಿಸಿದರೆ ವಿಶಾಲವಾದ ಆವರಣವಿದೆ. ಆವರಣದಲ್ಲಿ ತಾಯಿ ಬನಶಂಕರಿಯ ದೇವಾಲಯವಿದೆ.

ದೇವಾಲಯದ ಮುಂಭಾಗದಲ್ಲಿ ಕಲ್ಲಿನ ಕಂಬಗಳಿದ್ದು, ಮೇಲ್ಭಾಗದಲ್ಲಿ ಅರ್ಧಚಂದ್ರಾಕೃತಿಯ ಗೋಪುರವಿದೆ. ಗೋಪುರದ ಅಕ್ಕ ಪಕ್ಕದಲ್ಲಿ ಖಡ್ಗ ಹಾಗೂ ತ್ರಿಶೂಲ ಹಿಡಿದ ಗಣಗಳ ಪ್ರತಿಮೆ ಇದೆ. ಮಧ್ಯಭಾಗದಲ್ಲಿರುವ ಗೋಪುರದಲ್ಲಿ ಸಿಂಹದ ಮೇಲೆ ಕುಳಿತಿರುವ ಬನಶಂಕರಿಯ ಗಾರೆಯ ಮೂರ್ತಿಯಿದೆ.

ಕನ್ನಡರತ್ನ.ಕಾಂ, kannadaratna.com, bangalore_banashankaritemple, ಬೆಂಗಳೂರು ಬನಶಂಕರಿ ದೇವಾಲಯಆವರಣದಲ್ಲಿ ಕಲ್ಲಿನ ಸ್ತಂಭವಿದ್ದು, ಅದರ ಬಳಿ ಭಕ್ತರು ನಿಂಬೆಹಣ್ಣಿನ ದೀಪ ಹಚ್ಚುತ್ತಾರೆ. ಗರ್ಭಗೃಹದಲ್ಲಿ ಸಿಂಹವಾಹಿನಿಯಾದ ಬನಶಂಕರಿಯ ಸುಂದರ ಮೂರ್ತಿ ಇದೆ. 8 ಕೈಗಳುಳ್ಳ ದೇವಿಯ ಮೂರ್ತಿ ಅತ್ಯಂತ ಮನೋಹರವಾಗಿದೆ. ಈ ದೇವಾಲಯವನ್ನು 1915ರಲ್ಲಿ ಬಸಪ್ಪಶೆಟ್ಟರ ಪುತ್ರ ಸೋಮಣ್ಣ ಶೆಟ್ಟಿ ಎನ್ನುವವರು ನಿರ್ಮಿಸಿದರು ಎಂದು ಆಡಳಿತಾಧಿಕಾರಿಗಳು ತಿಳಿಸುತ್ತಾರೆ.

ಪ್ರತಿ ಮಂಗಳವಾರ, ಶುಕ್ರವಾರ ರಾಹುಕಾಲದಲ್ಲಿ ಇಲ್ಲಿ ವಿಶೇಷ ಪೂಜೆ ನಡೆಯುತ್ತದೆ. ಹುಣ್ಣಿಮೆ ಹಾಗೂ ಅಮಾವಾಸ್ಯೆಯ ದಿನವೂ ಇಲ್ಲಿ ವೈಭವದಿಂದ ಪೂಜೆ ನಡೆಯುತ್ತದೆ. ದಸರಾ ಕಾಲದಲ್ಲಿ 10 ದಿನ ಇಲ್ಲಿ ವೈಭವದ ಪೂಜೆ ನಡೆಯುತ್ತದೆ. ಪ್ರತಿವರ್ಷ ಸೆಪ್ಟೆಂಬರ್ ಹಾಗೂ ಅಕ್ಟೋಬರ್ ತಿಂಗಳಿನಲ್ಲಿ ಕೂಡ ದೇವಾಲಯದಲ್ಲಿ ವಿಶೇಷ ಪೂಜೆ ಜರುಗುತ್ತದೆ.

ಬೆಂಗಳೂರು ಬಸ್ ನಿಲ್ದಾಣದಿಂದ ಹಾಗೂ ಕೃಷ್ಣರಾಜೇಂದ್ರ ಮಾರುಕಟ್ಟೆಯಿಂದ, ಹೆಬ್ಬಾಳ, ಕೆಂಗೇರಿ, ಕೋರಮಂಗಲ ಮತ್ತು ಬೆಂಗಳೂರಿನ ಪ್ರಮುಖ ಬಡಾವಣೆಗಳಿಂದ ಬನಶಂಕರಿಗೆ ನೇರ ಬಸ್ ಸೌಲಭ್ಯವಿದೆ.

 

ಮುಖಪುಟ /ನಮ್ಮದೇವಾಲಯಗಳು