ಮುಖಪುಟ /ನಮ್ಮದೇವಾಲಯಗಳು  

ಚಿಕ್ಕತಿರುಪತಿ ಪ್ರಸನ್ನ ವೆಂಕಟರಮಣ ದೇವಾಲಯ

ಅಗ್ನಿ ದೇವ ಶಾಪ ವಿಮೋಚನೆಗಾಗಿ ಪ್ರತಿಷ್ಠಾಪಿಸಿದ ಮೂರ್ತಿಯ ಮಂದಿರ

chickka tirupati, malur, Kolar, Fire god, Sri venkateshwara temple, tamil nadu border, small Tirupati, ಚಿಕ್ಕ ತಿರುಪತಿ, temples of karnataka, karnataka Temples, T.M.Satish, Kannadaratna.com Chikka Tirupati god, Photo Courtesy Govt. Offiicial website*ಟಿ.ಎಂ. ಸತೀಶ್

ಕೋಲಾರ ಜಿಲ್ಲೆ ಮಾಲೂರಿಗೆ ಸಮೀಪದಲ್ಲೇ ಇರುವ ಚಿಕ್ಕ ತಿರುಪತಿ ನಾಲ್ಕು ಸಾವಿರ ವರ್ಷಗಳ ಸುದೀರ್ಘ ಇತಿಹಾಸ ಇರುವ ಪವಿತ್ರ ಪುಣ್ಯಕ್ಷೇತ್ರ. ಚಿಕ್ಕತಿರುಪತಿಗೆ ಪೌರಾಣಿಕ ಹಿನ್ನೆಲೆಯೂ ಇದೆ. ಇಲ್ಲಿರುವ ದಿವ್ಯ ವಿಗ್ರಹವನ್ನು ಸ್ವತಃ ಪಂಚಭೂತಗಳಲ್ಲಿ ಒಬ್ಬನಾದ ಅಗ್ನಿದೇವ ಪ್ರತಿಷ್ಠಾಪಿಸಿ, ಪೂಜಿಸಿದ ಎನ್ನುತ್ತದೆ ಸ್ಥಳ ಪುರಾಣ.

2 ಮತ್ತು 3ನೇ ಶತಮಾನದಲ್ಲಿ ಅವಿಭಜಿತ ಕೋಲಾರ ಜಿಲ್ಲೆ ಗಂಗರ ಆಳ್ವಿಕೆ ಒಳಪಟ್ಟಿತ್ತು ಆಗ ಇದು ಕೋಳಾಲನಾಡು ಎಂದು ಹೆಸರಾಗಿತ್ತು ಎಂದು ತಿಳಿದುಬರುತ್ತದೆ. ಈ ನಾಡಿನ ಚಿಕ್ಕ ತಿರುಪತಿಯಲ್ಲಿ ಚೋಳರ ಕಾಲದಲ್ಲಿ ಪ್ರಸನ್ನ ವೆಂಕಟರಮಣ ದೇವಾಲಯ ಜೀರ್ಣೋದ್ಧಾರ ಮಾಡಲಾಗಿದೆ ಎಂದು ಹೇಳಲಾಗುತ್ತದೆ. ಆದರೆ, ಇಲ್ಲಿನ ಪುರಾತನ ದೇವಾಲಯದ ಇತಿಹಾಸ ಮಹಾಭಾರತ ಕಾಲದ್ದೆಂಬ ಪ್ರತೀತಿ ಇದೆ. ದ್ವಾಪರಯುಗದಲ್ಲಿ ರಾಜ ಮಹಾರಾಜರು, ಋಷಿ ಮುನಿಗಳು ಮಾಡುತ್ತಿದ್ದ ಯಜ್ಞಯಾಗಾದಿಗಳ ಹವಿರ್ಭಾಗವನ್ನು ದೇವತೆಗಳಿಗೆ ಅರ್ಪಿಸುತ್ತಿದ್ದ ಹವ್ಯವಾಹನನಾದ ಅಗ್ನಿದೇವ ಯಥೇಚ್ಛವಾದ ತುಪ್ಪಸೇವನೆಯಿಂದಾಗಿ ಉದರಬೇನೆ (ಹೊಟ್ಟೆನೋವು)ಗೆ ತುತ್ತಾಗುತ್ತಾನೆ. ಸುರವೈದ್ಯರಾದ ಅಶ್ವಿನಿ ಕುಮಾರರು, ಔಷಧ ಸಸ್ಯಗಳಿಂದ ಸಮೃದ್ಧವಾದ ಖಾಂಡವ ವನವನ್ನು ಕಾಳ್ಗಿಚ್ಚಿನಿಂದ ಸುಟ್ಟರೆ, ಆ ಗಿಡಮೂಲಿಕೆಗಳ ಭಕ್ಷಣೆಯಿಂದ ನಿನ್ನ ಉದರ ಬೇನೆ ನಿವಾರಣೆ ಆಗುತ್ತದೆ ಎಂದು ಅಗ್ನಿದೇವನಿಗೆ ತಿಳಿಸುತ್ತಾನೆ. .

chickka tirupati, malur, Kolar, Fire god, Sri venkateshwara temple, tamil nadu border, small Tirupati, ಚಿಕ್ಕ ತಿರುಪತಿ, temples of karnataka, karnataka Temples, T.M.Satish, Kannadaratna.comಅಗ್ನಿದೇವ ಖಾಂಡವ ದಹನಕ್ಕಾಗಿ ಮಧ್ಯಮ ಪಾಂಡವ ಅರ್ಜುನನ ಮೊರೆ ಹೋಗುತ್ತಾನೆ. ಖಾಂಡವ ದಹನಕ್ಕೆ ಅಡ್ಡಿ ಆಗದಂತೆ ಆರ್ಜುನ ಹಾಗೂ ಶ್ರೀಕೃಷ್ಣ ಪರಮಾತ್ಮ ಬೆಂಗಾವಲಿಗೆ ನಿಲ್ಲುತ್ತಾರೆ. ಈ ದಹನ ಕಾಲದಲ್ಲಿ ತಕ್ಷಕನೆಂಬ ನಾಗ ಸುಟ್ಟಗಾಯಕ್ಕೆ ತುತ್ತಾಗುತ್ತಾನೆ, ಸಿಟ್ಟಿಗೆದ್ದ ತಕ್ಷಣ ನೀನು ತೇಜೋಹೀನನಾಗು  ಎಂದು ಅಗ್ನಿಗೆ ಶಪಿಸುತ್ತಾನೆ.

ಶಾಪಗ್ರಸ್ಥನಾದ ಅಗ್ನಿ ತನ್ನ ಸುಡುವ ಶಕ್ತಿಯನ್ನೇ ಕಳೆದುಕೊಳ್ಳುತ್ತಾನೆ. ಇದರಿಂದಾಗಿ ಋಷಿ ಮುನಿಗಳು ಮಾಡುವ ಯಾಗದ ಹವಿರ್ಭಾಗ ದೇವತೆಗಳ ತಲುಪದ ಸ್ಥಿತಿಯೂ ಬಂದೊದಗುತ್ತದೆ. ಇದರಿಂದ ದೇವತೆಗಳು ಹಾಗೂ ಋಷಿ ಮುನಿಗಳು ವ್ಯಾಕುಲಗೊಳ್ಳುತ್ತಾರೆ.  ಅಗ್ನಿ ದೇವನಿಗೆ ತಕ್ಷಕ ನೀಡಿರುವ ಶಾಪ ವಿಮೋಚನೆ ಮಾಡಿಕೊಳ್ಳಲು ನಾರಾಯಣನ ಕುರಿತು ತಪಸ್ಸು ಆಚರಿಸುವಂತೆ ತಿಳಿಸುತ್ತಾರೆ.

ಹಿರಿಯ ಮಾರ್ಗದರ್ಶನದಂತೆ ಅಗ್ನಿದೇವ ಒಂದು ಮಂಡಲ ಕಾಲ ನಾರಾಯಣನ ಪೂಜೆ ಮಾಡಿ ತಪಸ್ಸು ಮಾಡುತ್ತಾನೆ. ಆಗ ನಾರಾಯಣ ಪ್ರಸನ್ನ ವೆಂಕಟರಮಣನ ರೂಪದಲ್ಲಿ ದರ್ಶನ ನೀಡಿ ಶಾಪ ವಿಮೋಚನೆ ಮಾಡುತ್ತಾನೆ.  ವರದ ನಾರಾಯಣನ (ಪ್ರಸನ್ನ ವೆಂಕಟರಮಣ) ಕೃಪೆಯಿಂದ ಅಗ್ನಿ ಶಾಪವಿಮುಕ್ತನಾಗಿ ಮತ್ತೆ ತನ್ನ ಹಿಂದಿನ ಕಾಂತಿ ಪಡೆಯುತ್ತಾನೆ. ಶ್ರೀಮನ್ನಾರಾಯಣನಿಗೆ ಕೃತಜ್ಞತೆ ಅರ್ಪಿಸುವ ಸಲುವಾಗಿ ಈ ಸ್ಥಳದಲ್ಲಿ ತನಗೆ ವಿಷ್ಣು ದರ್ಶನ ನೀಡಿದ ರೂಪದಲ್ಲೇ ವರದ ನಾರಾಯಣಸ್ವಾಮಿ ವಿಗ್ರಹ ಸ್ಥಾಪಿಸಿ ಪೂಜಿಸಿ, ದೇವಾಲಯ ನಿರ್ಮಿಸಿದನೆಂದು ಹೇಳಲಾಗುತ್ತದೆ.

chickka tirupati, malur, Kolar, Fire god, Sri venkateshwara temple, tamil nadu border, small Tirupati, ಚಿಕ್ಕ ತಿರುಪತಿ, temples of karnataka, karnataka Temples, T.M.Satish, Kannadaratna.comದೇವಾಲಯವನ್ನು ಈಗ ಜೀರ್ಣೋದ್ಧಾರ ಮಾಡಲಾಗಿದ್ದು, ಸುಂದರವಾದ ಐದು ಅಂತಸ್ತುಗಳ ರಾಜಗೋಪುರ - ದ್ವಾರಬಂಧ ನಿರ್ಮಿಸಲಾಗಿದೆ. ಗೋಪುರದಲ್ಲಿ ಶ್ರೀನಿವಾಸ ಕಲ್ಯಾಣ, ಜಯವಿಜಯರು ಹಾಗೂ ಪರಿವಾರ ದೇವತೆಗಳ ಗಾರೆಯ ಶಿಲ್ಪಗಳಿವೆ. ಈ ದ್ವಾರದ ಮೂಲಕ ದೇವಾಲಯದ ಒಳ ಹೊಕ್ಕರೆ ಭವ್ಯವಾದ ಸುವರ್ಣ ವರ್ಣದ ಎರಡು ಗೋಪುರಗಳು ಮನಸೆಳೆಯುತ್ತವೆ.  ಅದರಲ್ಲೂ ಹಲವು ದೇವತೆಗಳ ಗಾರೆಯ ಶಿಲ್ಪಗಳಿವೆ. ಮುಖಮಂಟಪ, ಅಂತರಾಳ, ಗರ್ಭಗೃಹವನ್ನು ದೇವಾಲಯ ಒಳಗೊಂಡಿದೆ.

ಅಂತರಾಳ ಪ್ರವೇಶದ ಬಾಗಿಲುವಾಡಕ್ಕೆ ಹಿತ್ತಾಳೆಯ ಕವಚ ಹಾಕಲಾಗಿದ್ದು, ಇದರಲ್ಲಿ ತ್ರಿಪುಂಡರ, ಶಂಖ, ಚಕ್ರಗಳಿವೆ ವಿಮಾನದಲ್ಲಿ ರಂಗನಾಥನ ವಿಗ್ರಹಗಳಿವೆ. ಇನ್ನು ಪ್ರಧಾನ ಗರ್ಭಗೃಹದಲ್ಲಿ, ಮೂರೂವರೆ ಅಡಿ ಎತ್ತರದ ಕೃಷ್ಣಶಿಲೆಯ ವಿಗ್ರಹ ಮನಮೋಹಕವಾಗಿದೆ. ಶ್ರೀದೇವಿ, ಭೂದೇವಿ ಸಹಿತನಾಗಿರುವ ಶ್ರೀನಿವಾಸ ಇಲ್ಲಿ ಶ್ರೀನಿವಾಸನ ಕೈ ಹರಸುವಂತೆ ಮೇಲ್ಮುಖವಾಗಿ ಅಭಯಮುದ್ರೆಯಲ್ಲಿರುವುದು ವಿಶೇಷ. ಉಳಿದ ಶ್ರೀನಿವಾಸನ ದೇವಾಲಯಗಳಲ್ಲಿ ದೇವರ ಕೈ ವರದ ಮುದ್ರೆ ಅಂದರೆ ಭೂಮಿಯನ್ನು ನೋಡುತ್ತಿರುತ್ತದೆ. ಇದಕ್ಕೆ ವೈಕುಂಠ ಹಸ್ತ ಎಂದೂ ಹೇಳುತ್ತಾರೆ. ದಕ್ಷಿಣ ಭಾರತದಲ್ಲಿರುವ ಏಳು ತಿರುಪತಿಗಳ ಪೈಕಿ ಇದೂ ಒಂದೆಂದೂ. ಇಲ್ಲಿಯೂ ಸಹ ತಿರುಪತಿ ತಿಮ್ಮಪ್ಪನಿಗೆ ನಡೆಯುವಂತೆಯೇ ರಥೋತ್ಸವ, ಬ್ರಹ್ಮೋತ್ಸವ, ಕಲ್ಯಾಣೋತ್ಸವ ಇತ್ಯಾದಿ ಎಲ್ಲ ಸೇವೆಗಳೂ ನಡೆಯುತ್ತವೆ. ಭಕ್ತರು ಇಲ್ಲಿಯೂ ವರದಸ್ವಾಮಿಗೆ ಮುಡಿ ಕೊಡುತ್ತಾರೆ. ದೊಡ್ಡ ತಿರುಪತಿಗೆ ಹೋಗುವ ಹಲವು ಭಕ್ತರು ಮೊದಲು ಚಿಕ್ಕ ತಿರುಪತಿಗೆ ಬಂದು ಹೋಗುವ ವಾಡಿಕೆಯೂ ಇದೆ ಎಂದು ದೇವಾಲಯದ ಅರ್ಚಕರಾದ ಜಿ. ಶ್ರೀನಿವಾಸ್ ಅವರು ತಿಳಿಸುತ್ತಾರೆ.

ಮಾರ್ಗಶಿರ ಮಾಸದ ವೈಕುಂಠ ಏಕಾದಶಿಯ ದಿನ ಮತ್ತು ಜನವರಿ 1ನೇ ತಾರೀಖು ಹಾಗೂ ಶ್ರಾವಣ ಶನಿವಾರಗಳಂದು ಮತ್ತು  ಧನುರ್ಮಾಸದಲ್ಲಿ ದೇವಾಲಯದಲ್ಲಿ ವಿಶೇಷ ಪೂಜೆಗಳು ನಡೆಯುತ್ತವೆ. ಪ್ರತಿ ನಿತ್ಯ ವೈಖಾನಸಾಗಮ ರೀತ್ಯ ಪೂಜಾ ಕೈಂಕರ್ಯಗಳು ನೆರವೇರುತ್ತವೆ. ರಥ ಸಪ್ತಮಿಯ ದಿನ ಸೂರ್ಯಪ್ರಭೆ ಉತ್ಸವ ಇಲ್ಲಿನ ವಿಶೇಷಗಳಲ್ಲಿ ಒಂದು. ಪ್ರತಿ ವರ್ಷ ಚೈತ್ರ ಮಾಸದ ಹುಣ್ಣಿಮೆಯ ದಿನ ಸ್ವಾಮಿಯವರಿಗೆ ಪುಷ್ಪ ಪಲ್ಲಕ್ಕಿ ಉತ್ಸವ ನಡೆಯುತ್ತದೆ, ಪುಬ್ಬ ನಕ್ಷತ್ರದ ದಿನ ಬ್ರಹ್ಮ ರಥೋತ್ಸವ ಜರುಗುತ್ತದೆ.

ವಿವಾಹ ವಿಳಂಬ ಆಗುವವರು ಇಲ್ಲಿ ಬಂದು ಹರಕೆ ಹೊತ್ತು ಹೋದರೆ. ಅವರಿಗೆ ಕಂಕಣಭಾಗ್ಯ ಕೂಡಿ ಬರುತ್ತದಂತೆ. ಹೀಗಾಗಿ ಇಲ್ಲಿ ಹರಕೆ ಹೊತ್ತ ತರುವಾಯ ವಿವಾಹ ಆದವರು ಇಲ್ಲಿ ಬಂದು ಕಲ್ಯಾಣೋತ್ಸವ ನಡೆಸುತ್ತಾರೆ ಎಂದು  ಅರ್ಚಕರಾದ ಶ್ರೀನಿವಾಸ್ ಹೇಳುತ್ತಾರೆ.

ಚೋಳರ ದೊರೆ ಜನಮೇಜಯ 11ನೇ ಶತಮಾನದಲ್ಲಿ ಈ ದೇವಾಲಯಕ್ಕೆ ಭೇಟಿಕೊಟ್ಟ ಬಗ್ಗೆ ಇಲ್ಲಿರುವ ಶಾಸನದಲ್ಲಿ ಉಲ್ಲೇಖವಿದೆ. ಚೋಳರ ಕಾಲದಲ್ಲಿ ದೇವಾಲಯದ ಅಭಿವೃದ್ಧಿಕಾರ್ಯಗಳು ನಡೆದಿವೆ ಎಂಬುದು ದೇವಾಲಯದಲ್ಲಿರುವ ಕಲ್ಲಿನ ಕಂಬಗಳಲ್ಲಿ ಕೆತ್ತಲಾಗಿರುವ ಸಿಂಹದ ಕೆತ್ತನೆಗಳಿಂದ ತಿಳಿದುಬರುತ್ತದೆ ಎನ್ನುತ್ತಾರೆ ಇತಿಹಾಸ ತಜ್ಞರು.

ಬೆಂಗಳೂರಿನಿಂದ 45 ಕಿಲೋ ಮೀಟರ್ ದೂರದಲ್ಲಿರುವ ಚಿಕ್ಕತಿರುಪತಿಗೆ ಹೋಗಲು ಕೋಲಾರ, ಮಾಲೂರು ಹಾಗೂ ಬೆಂಗಳೂರಿನಿಂದ ನೇರ ಬಸ್ ಸೌಲಭ್ಯವಿದೆ. ಕೋಲಾರದಿಂದ 15 ಕಿ.ಮೀ ಮತ್ತು ಮಾಲೂರಿನಿಂದ 15 ಕಿ.ಮೀ. ದೂರದಲ್ಲಿ ಈ ಕ್ಷೇತ್ರವಿದೆ. ಧಾರ್ಮಿಕ ದತ್ತಿ ಇಲಾಖೆಗೆ ಈ ದೇವಾಲಯ ಸೇರಿದೆ.

ಹತ್ತಿರದಲ್ಲಿರುವ ಇತರ  ಪುಣ್ಯಕ್ಷೇತ್ರಗಳು : ಮುಳಬಾಗಿಲು, ಕೋಟಿಲಿಂಗೇಶ್ವರ, ಬಂಗಾರ ತಿರುಪತಿ, ಮಾರ್ಕಂಡೇಶ್ವರಸ್ವಾಮಿ ಬೆಟ್ಟ, ಆವನಿ, ಕುರುಡುಮಲೆ ಹಾಗೂ ಅಂತರಗಂಗೆ.

ಮುಖಪುಟ /ನಮ್ಮದೇವಾಲಯಗಳು