ಮುಖಪುಟ /ನಮ್ಮದೇವಾಲಯಗಳು

ದುರ್ಗಾಪರಮೇಶ್ವರಿ ದೇವಾಲಯ ವಿದ್ಯಾರಣ್ಯಪುರ

*ಟಿ.ಎಂ.ಸತೀಶ್

Vidyaranyapura Durgaparameswari temple, kannadaratna.com, ಕನ್ನಡರತ್ನ.ಕಾಂ, ದುರ್ಗಾಪರಮೇಶ್ವರಿ ದೇವಾಲಯ, ವಿದ್ಯಾರಣ್ಯಪುರಬೆಂಗಳೂರು ಭಾರತ್ ಎಲೆಕ್ರ್ಟಾನಿಕ್ಸ್ ಲಿಮಿಟೆಡ್ -ಬಿ.ಇ.ಎಲ್. ಬಳಿ ಇರುವ ವಿದ್ಯಾರಣ್ಯಪುರದ ಶ್ರೀದುರ್ಗಾ ಪರಮೇಶ್ವರಿ ದೇವಾಲಯ ನೋಡಲೇಬೇಕಾದ ಪುಣ್ಯಸ್ಥಳ. ವಿದ್ಯಾರಣ್ಯಪುರ ಬಸ್ ನಿಲ್ದಾಣದ ಮುಖ್ಯರಸ್ತೆಯಲ್ಲಿಯೇ ದೇವಾಲಯದ ಸ್ವಾಗತ ಕಮಾನು ಭಕ್ತರನ್ನು ಸ್ವಾಗತಿಸುತ್ತದೆ.

ಭವ್ಯವಾದ ಸ್ವಾಗತ ಕಮಾನು ದಾಟಿ ತುಸು ದೂರ ಹೋಗಿ ಬಲಕ್ಕೆ ತಿರುಗಿದರೆ ರಸ್ತೆಗೆ ನೇರವಾಗಿ 7 ಅಂತಸ್ತುಗಳ 108 ಅಡಿ ಎತ್ತರದ ಸುಂದರ ಹಾಗೂ ಕಲಾತ್ಮಕವಾದ ರಾಜಗೋಪುರ ಮನಸೆಳೆಯುತ್ತದೆ. ದ್ರಾವಿಡ ಶೈಲಿಯಲ್ಲಿರುವ ಈ ಗೋಪುರದಲ್ಲಿ ರುಂಡಮಾಲಿನಿ, ಮಹಿಷಾಸುರಮರ್ದಿನಿ, ಮಹಾಲಕ್ಷ್ಮೀ, ಅಸುರ ಗಣ ಸೇರಿದಂತೆ ನೂರಾರು ಪುತ್ಥಳಿಗಳಿವೆ. 

20 ಅಡಿಗೂ ಹೆಚ್ಚು ಎತ್ತರದ ತೇಗದ ಕಲಾತ್ಮಕ ಬಾಗಿಲುಗಳನ್ನು ಒಳಗೊಂಡ ಮಹಾದ್ವಾರದ ಎರಡೂ ಪಕ್ಕದಲ್ಲಿ ಸಿಂಹದ ಮೇಲೆ ಕುಳಿತ ಚಾಮುಂಡೇಶ್ವರಿಯ ಮೂರ್ತಿಗಳಿವೆ. ದೇವಾಲಯದ ಇಕ್ಕೆಲಗಳಲ್ಲಿ ಜಯ ವಿಜಯರ 3 ಅಡಿ ಎತ್ತರದ ಕಲ್ಲಿನ ಶಿಲ್ಪಗಳಿವೆ.

1995ರಲ್ಲಿ ನಿರ್ಮಿಸಲಾಗಿರುವ ಈ ಭವ್ಯ ಮಹಾದ್ವಾರ ದಾಟಿ ಮುಂದೆ ಸಾಗಿದರೆ ಎಡಭಾಗದಲ್ಲಿರುವ ಕಂಬದಲ್ಲಿ ಸಿದ್ಧಿಯನ್ನು ತೊಡೆಯ ಮೇಲೆ ಕೂರಿಸಿಕೊಂಡಿರುವ ಸಿದ್ಧಿ ವಿನಾಯಕನ ದರ್ಶನವಾಗುತ್ತದೆ. ಮಹಾದ್ವಾರದ ಎದುರು ಇರುವ ಪುಟ್ಟ ಮಂದಿರದಲ್ಲಿ ಬೆಳ್ಳಿಯ ಕವಚಗಳಿಂದ ಅಲಂಕೃತನಾದ ವಿಘ್ನೇಶ್ವರನ ಮಂದಿರವಿದೆ. ಪಕ್ಕದಲ್ಲಿಯೇ ದಕ್ಷಿಣಾಮೂರ್ತಿ, ಹಿಂಭಾಗದಲ್ಲಿ ಸುಬ್ರಹ್ಮಣ್ಯ ಹಾಗೂ ಅಲ್ಲಿಯೇ ಸಮೀಪದಲ್ಲಿ 18 ಭುಜಗಳನ್ನು ಹೊಂದಿರುವ ವಿಜಯದುರ್ಗೆಯ ಮೂರ್ತಿಗಳಿವೆ. ವಿಶಾಲವಾದ ಪ್ರಾಕಾರವನ್ನೊಳಗೊಂಡ ದೇವಾಲಯವನ್ನು ಪ್ರದಕ್ಷಿಣೆ ಹಾಕಿಬಂದರೆ, ಬಲಭಾಗದಲ್ಲಿ ಬಾಲಾಂಜನೇಯ, ನವಗ್ರಹ ಗುಡಿ ಹಾಗೂ ಉತ್ಸವ ಮೂರ್ತಿಯ ಪುಟ್ಟ ದೇವಾಲಯಗಳಿವೆ.

Vidyaranyapura Durgaparameswari temple, kannadaratna.com, ಕನ್ನಡರತ್ನ.ಕಾಂ, ದುರ್ಗಾಪರಮೇಶ್ವರಿ ದೇವಾಲಯ, ವಿದ್ಯಾರಣ್ಯಪುರಅದರ ಪಕ್ಕದಲ್ಲಿ  ಶ್ರೀಗುರು ಶನೇಶ್ವರ ಸ್ವಾಮಿಯ ಸುಂದರ ಕೃಷ್ಣ ಶಿಲೆಯ ಪ್ರತಿಮೆಯಿದೆ. ಅದರ ಪಕ್ಕದಲ್ಲಿಯೇ ಶ್ವಾನದ ಜೊತೆ ತ್ರಿಶೂಲಧಾರಿಯಾಗಿ ನಿಂತ ದುರ್ಗೆಯ ಪ್ರತಿಮೆ ಇದೆ. ಈ ಪ್ರತಿಮೆಗೆ ಭಕ್ತರು ತಮ್ಮ ಕೋರಿಕೆಗಳನ್ನು ಬರೆದು ದಾರದಲ್ಲಿ ಕಟ್ಟುತ್ತಾರೆ. ಹೀಗೆ ತಾಯಿಗೆ ಕೋರಿಕೆ ಒಪ್ಪಿಸಿದರೆ ಅದು ನೆರವೇರುತ್ತದೆ ಎಂಬುದು ಭಕ್ತರ ನಂಬಿಕೆ. ಅದರ ಪಕ್ಕದಲ್ಲಿಯೇ ಅಷ್ಟದುರ್ಗೆಯರ ಮಂದಿರವಿದೆ. ಈ ಮಂದಿರದಲ್ಲಿ ಹಲ್ಲಿಯ ಉಬ್ಬು ಶಿಲ್ಪವೂ ಇದೆ. ಈ ಹಲ್ಲಿ ಮುಟ್ಟಿ ನಮಸ್ಕರಿಸಿದರೆ ಹಲ್ಲಿಬಿದ್ದ ಶಕುನ, ದೋಷ ನಿವಾರಣೆ ಆಗುತ್ತದೆ ಎಂಬುದು ಪ್ರತೀತಿ.

ಪ್ರಾಕಾರವನ್ನು ಒಂದು ಸುತ್ತು ಹಾಕಿ ಪ್ರಧಾನ ದೇವಾಲಯ ಪ್ರವೇಶಿಸಿದರೆ ಮೊದಲಿಗೆ ಸುಂದರವಾದ ನಾಗಾಭರಣ ಅಲಂಕಾರದಿಂದ ಕಂಗೊಳಿಸುವ ಶಿವಲಿಂಗ ದರ್ಶನವಾಗುತ್ತದೆ. ಶಿವಲಿಂಗಕ್ಕೆ ಭಕ್ತಿಯಿಂದ ವಂದಿಸಿ ಮುಂದೆ ಬಂದರೆ ಮಧ್ಯದ ಪ್ರಧಾನ ಗರ್ಭಗುಡಿಯಲ್ಲಿ ಮಹಿಷಾಸುರ ಮರ್ದಿನಿಯ 6 ಅಡಿ ಎತ್ತರದ ಸುಂದರ ಮೂರ್ತಿಯಿದೆ. Vidyaranyapura Durgaparameswari temple, kannadaratna.com, ಕನ್ನಡರತ್ನ.ಕಾಂ, ದುರ್ಗಾಪರಮೇಶ್ವರಿ ದೇವಾಲಯ, ವಿದ್ಯಾರಣ್ಯಪುರತಾಯಿಯ ಪಾದದ ಬಳಿ ಎಮ್ಮೆಯ ತಲೆ ಇದೆ. ಈ ತೆಲೆಗೆ ಬೆಳ್ಳಿಯ ಕವಚದಿಂದ ಅಲಂಕರಿಸಲಾಗಿದೆ. ಮಹಿಷಾಸುರನನ್ನು ಕೊಂದು ನಿಂತ ತಾಯಿ ಪ್ರಸನ್ನಚಿತ್ತದಲ್ಲಿದ್ದಾಳೆ. ತಾಯಿಯ ತಲೆಯ ಹಿಂದೆ ಸೂರ್ಯ ಭೂಷಣವಿದೆ. ದುರ್ಗ ಪರಮೇಶ್ವರಿ ಅಮ್ಮನವರ ಗರ್ಭಗೃಹದ ಪಕ್ಕದಲ್ಲಿರುವ ಮತ್ತೊಂದು ಗರ್ಭಗುಡಿಯಲ್ಲಿ ಶ್ರೀನಿವಾಸದೇವರನ್ನು ಪ್ರತಿಷ್ಠಾಪಿಸಲಾಗಿದೆ. ಶಿವಲಿಂಗದ ಎದುರು ನಂದಿ ಹಾಗೂ ವೆಂಕಟೇಶ್ವರ ದೇವರ ಎದುರು ಗರುಡ ಮೂರ್ತಿಯನ್ನು ಪ್ರತಿಷ್ಠಾಪಿಸಲಾಗಿದೆ.

ಮನಮೋಹಕವಾದ ದುರ್ಗಪರಮೇಶ್ವರಿಗೆ ನಿತ್ಯ ಪೂಜೆ ನಡೆಯುತ್ತದೆ. ಶುಕ್ರವಾರ, ಮಂಗಳವಾರ ಹಾಗೂ ಭಾನುವಾರ ಇಲ್ಲಿಗೆ ನೂರಾರು ಭಕ್ತರು ಆಗಮಿಸುತ್ತಾರೆ. 1988ರ ಫೆ.21ರಂದು ಇಲ್ಲಿ ಶ್ರೀದುರ್ಗಾಪರಮೇಶ್ವರಿಯ ವಿಗ್ರಹ ಪ್ರತಿಷ್ಠಾಪಿಸಲಾಯಿತು. 1987ರಲ್ಲಿ ದೇವಾಲಯ ನಿರ್ಮಾಣಕ್ಕೆ ಶಿಲಾನ್ಯಾಸ ನೆರವೇರಿತ್ತು ಆಗ ಅರ್ಚಕರಾಗಿದ್ದ ರಾಮಾಶಾಸ್ತ್ರೀಯವರು ಈ ದೇವಾಲಯದ ನಿರ್ಮಾಣಕ್ಕೆ ಹಾಗೂ ಅದರ ಅಭಿವೃದ್ಧಿಗೆ ಕಾರಣರಾಗಿದ್ದಾರೆ. ಪ್ರಸ್ತುತ ರಾಮಾಶಾಸ್ತ್ರಿಗಳ ಪುತ್ರ ವಿನಯಕುಮಾರ್ ಶರ್ಮಾ ಪ್ರಧಾನ ಅರ್ಚಕರಾಗಿದ್ದಾರೆ.

ಈಗ ಭಕ್ತಾದಿಗಳ ನೆರವಿನಿಂದ ಟ್ರಸ್ಟ್ ನವರು ದೇವಾಲಯವನ್ನು ಸಂಪೂರ್ಣ ಅಭಿವೃದ್ಧಿ ಪಡಿಸಿದ್ದಾರೆ. ದೇವಾಲಯದ ನವರಂಗದ ಮೇಲಿನ ಗೋಪುರದಲ್ಲಿ ಕೂಡ ತಾಯಿ ದುರ್ಗೆಯ ಲೀಲೆ ಹಾಗೂ ಮಹಿಮೆ ಸಾರುವ ಗಾರೆಯ ಪ್ರತಿಮೆಗಳಿವೆ. ದೇವಾಲಯದ ಪ್ರಕಾರದಲ್ಲಿ ದೀಪದ ಸ್ತಂಭ ಹಾಗೂ ಗರುಡಗಂಭವೂ ಇದೆ.

ಮದುವೆ ಆಗದ ಹೆಣ್ಣುಮಕ್ಕಳು, ನಿರುದ್ಯೋಗಿ ಯುವಕರು, ವಿದ್ಯಾರ್ಥಿಗಳು ಇಲ್ಲಿ ಬಂದು ಹರಕೆ ಕಟ್ಟಿಕೊಳ್ಳುತ್ತಾರೆ. ತಮ್ಮ ಹರಕೆಯನ್ನು ಹಳದಿ ಚೀಟಿಯಲ್ಲಿ ಬರೆದು ದೇವರಿಗೆ ಕಟ್ಟುತ್ತಾರೆ. ತಮಿಳುನಾಡಿನಿಂದ ಕೂಡ ಭಕ್ತರು ಇಲ್ಲಿಗೆ ಆಗಮಿಸಿ ಪೂಜೆ ಸಲ್ಲಿಸುತ್ತಾರೆ. ನವರಾತ್ರಿಯಲ್ಲಿ ಇಲ್ಲಿ 9 ದಿನವೂ ವಿಶೇಷ ಪೂಜೆ ನಡೆಯುತ್ತದೆ.

ಮುಖಪುಟ /ನಮ್ಮ ದೇವಾಲಯಗಳು