ಮುಖಪುಟ /ನಮ್ಮದೇವಾಲಯಗಳು 

ಮಧುಗಿರಿಯ ದಂಡಿನ ಮಾರಮ್ಮ

 ಶಕ್ತಿದೇವತೆಯ ತಾಣ

*ಟಿ.ಎಂ.ಸತೀಶ್

ಮಧುಗಿರಿ ದಂಡಿನ ಮಾರಮ್ಮ ದೇವಾಲಯ, Madhugiri Dandinamaramma, Tumkurಮಧುಗಿರಿ ತುಮಕೂರು ಜಿಲ್ಲೆಯ ಪ್ರಮುಖ ತಾಲೂಕು ಕೇಂದ್ರ. ತುಮಕೂರಿನಿಂದ 43 ಕಿಲೋ ಮೀಟರ್ ದೂರದಲ್ಲಿರುವ ಮಧುಗಿರಿಯ ಮೊದಲ ಹೆಸರು ಮದ್ದಗಿರಿ. ಮಧು ಎಂಬ ಹೆಸರಿನ ಗಿರಿಯ ಉತ್ತರದ ಬುಡದಲ್ಲಿ ಈ ಊರು ಇದ್ದುದರಿಂದ ಮದ್ದಗಿರಿ ಎಂಬ ಹೆಸರು ಇತ್ತಂತೆ. 1927ರಿಂದ ಮಧುಗಿರಿ ಎಂಬ ಹೆಸರು ರೂಢಿಗೆ ಬಂದಿದೆ.

ಸುಂದರ ಹಾಗೂ ವಿಶಾಲವಾದ ಏಕಶಿಲಾ ಗಿರಿಕೋಟೆ ಇಲ್ಲಿನ ಆಕರ್ಷಣೆ. ಹಿಂದೆ ಈ ಊರು ಮೈಸೂರು ಒಡೆಯರ ಪ್ರಮುಖ ಠಾಣೆಯಾಗಿತ್ತು ಎಂದು ಇತಿಹಾಸ ಹೇಳುತ್ತದೆ. ಇದಕ್ಕೆ ಸಾಕ್ಷಿಯಾಗಿ ಬೆಟ್ಟದ ಮೇಲೆ ರಾಜರು ಕಟ್ಟಿಸಿದ ಕುದುರೆಲಾಯ, ಶಸ್ತ್ರಾಸ್ತ್ರ ಕೋಠಿಯೂ ಇದೆ.  ಬೆಟ್ಟದ ತಪ್ಪಲಿನಲ್ಲಿ ದಂಡಿನ ಮಾರಮ್ಮ., ಕೋಟೆ ಕೋದಂಡರಾಮ, ಮಲ್ಲೇಶ್ವರ ಸ್ವಾಮಿ ದೇವಾಲಯ ಹಾಗೂ ವೆಂಕಟರಮಣನ ದೇಗುಲಗಳಿವೆ.

ಮಧುಗಿರಿ ದಂಡಿನ ಮಾರಮ್ಮ, Madhugiri Dandina Marammaಮಧುಗಿರಿಯಲ್ಲಿನ ದಂಡಿನ ಮಾರಮ್ಮನ ದೇವಾಲಯ ವಿಶೇಷವಾದ್ದು. ಈ ಹೆಸರು ಕೇಳಿದೊಡನೆಯೇ  ದಂಡಿಗೂ ಮಾರಮ್ಮನಿಗೂ ಏನು ಸಂಬಂಧ ಎಂಬ ಪ್ರಶ್ನೆ ಏಳುವುದು ಸಹಜ. ಇದಕ್ಕೊಂದು ಬಲವಾದ ಕಾರಣವಿದೆ. ಹಿಂದೆ ರಾಜರಾಳ್ವಿಕೆಯ ಕಾಲದಲ್ಲಿ ಸೈನಿಕರು ಪುರ ಪ್ರವೇಶಿಸುವ ಮುನ್ನ ಈ ದೇವಾಲಯಕ್ಕೆ ಹೋಗಿ ಪೂಜೆ ಸಲ್ಲಿಸುತ್ತಿದ್ದರಂತೆ. ಸೇನಾ ಶಕ್ತಿಯನ್ನು ನಿರಂತರವಾಗಿ ಕಾಪಾಡುತ್ತಿದ್ದ ತಾಯಿಗೆ ಅಂದಿನಿಂದ ದಂಡಿನ ಮಾರಮ್ಮ ಎಂದೇ ಹೆಸರು ಬಂದಿದೆ. ಇಂದಿಗೂ ಈ ಊರಿನಲ್ಲಿ ಶುಭಕಾರ್ಯಕ್ಕೆ ಮುನ್ನ ಗ್ರಾಮದೇವತೆ ಮಾರಮ್ಮನಿಗೆ ಪೂಜೆ ಸಲ್ಲಿಸುವುದು ವಾಡಿಕೆ. ವರ್ಷಕ್ಕೊಮ್ಮೆ ಇಲ್ಲಿ ಯುಗಾದಿ ಹಬ್ಬಕ್ಕೂ ಮುನ್ನ ದೊಡ್ಡ ಜಾತ್ರೆ ನಡೆಯುತ್ತದೆ. ಇಲ್ಲಿ ನಡೆಯುವ ದನಗಳ ಜಾತ್ರೆ ಮತ್ತು ರಥೋತ್ಸವ ರಾಜ್ಯದ್ಯಂತ ಖ್ಯಾತಿ ಪಡೆದಿದೆ. ಅಷ್ಟೇ ಅಲ್ಲ ನೆರೆಯ ತಮಿಳುನಾಡು, ಆಂಧ್ರದಿಂದಲೂ ಇಲ್ಲಿಗೆ ಭಕ್ತರು ಆಗಮಿಸುತ್ತಾರೆ.

ಮುಖ್ಯರಸ್ತೆಯ ಸಮೀಪದಲ್ಲೇ ಇರುವ ಈ ದೇವಾಲಯಕ್ಕೆ ನಾಲ್ಕು ಕಲ್ಲು ಕಂಬಗಳಿಂದ ನಿರ್ಮಿಸಿದ ದ್ವಾರವಿದೆ. ಎಡ ಬಲದಲ್ಲಿರುವ ಕಂಬಗಳಲ್ಲಿ ರಾಕ್ಷಸರ ತಲೆಗಳ ಕೆತ್ತನೆ ಇದೆ, ಈ ಕಂಬದ ಮೇಲ್ಭಾಗದಲ್ಲಿ ಅಡ್ಡಲಾಗಿ ಎರಡು ಕಂಬ ಅಳವಡಿಸಲಾಗಿದೆ.

Madhugiri Dandina Maramma, ಮಧುಗಿರಿ ದಂಡಿನ ಮಾರಮ್ಮದೇವಾಲಯದ ಮುಂಭಾಗದಲ್ಲಿ ಪುಟ್ಟ ಮಂಟಪ ಇದೆ. ಮೇಲ್ಭಾಗದಲ್ಲಿ ಗಾರೆ ಗಚ್ಚಿನ ಗೋಪುರಗಳಿವೆ. ಈ ಗೋಪುರದ ಗೂಡುಗಳಲ್ಲಿ, ಎರಡು ಸಿಂಹಗಳ ಮಧ್ಯೆ ಪೀಠದಲ್ಲಿ ಕುಳಿತ ದುರ್ಗೆಯ ವಿಗ್ರಹವಿದೆ. ಎಡ ಬಲದ ಗೂಡುಗಳಲ್ಲಿ ಶಕ್ತಿ ದೇವತೆಗಳ ಗಾರೆಯ ಶಿಲ್ಪಗಳಿವೆ. ಗೋಪುರದ ಸುತ್ತ ನಾಲ್ಕೂ ಮೂಲೆಗಳಲ್ಲಿ ಸಿಂಹದ ಗಾರೆ ವಿಗ್ರಹಗಳಿವೆ. ಗರ್ಭಗೃಹದ ಮೇಲ್ಭಾಗದಲ್ಲಿ ಗೋಪುರ ಹಾಗೂ ಕಳಶವಿದೆ. ಮೂರು ದ್ವಾರಗಳಿರುವ ಈ ದೇವಾಲಯದ ಪ್ರಧಾನ ಗರ್ಭಗೃಹದ ಬಾಗಿಲುವಾಡದಲ್ಲಿ ಸೂರ್ಯ , ಚಂದ್ರ, ನವಿಲಗರಿ ಹಾಗೂ ಹೂವಿನ ಚಿತ್ತಾರಗಳಿವೆ. ಪ್ರಧಾನಗರ್ಭಗೃಹದಲ್ಲಿ ಮಾರಮ್ಮನ ಬೃಹತ್ ಮಣ್ಣಿನ ಮೂರ್ತಿಯಿದೆ.

ದೇವಾಲಯದ ಹೊರಗೆ ಚಂಡಿಕೇಶ್ವರಿ, ಮಹಿಷಾಸುರ ಮರ್ಧಿನಿಯ ಬೃಹತ್ ಗಾರೆಯ ಶಿಲ್ಪಗಳಿವೆ.  ನಿಂಬೆಹಣ್ಣನ್ನು ಕತ್ತರಿಸಿ ಬಟ್ಟಲಿನಂತೆ ಮಾಡಿ ಎಣ್ಣೆ ಹಾಕಿ ದೀಪ ಹಚ್ಚುವುದು ಇಲ್ಲಿನ ವಿಶೇಷ. .

ದಾರಿ: ತುಮಕೂರಿನಿಂದ 43 ಕಿ.ಮೀ. ದೂರದಲ್ಲಿರುವ ಇಲ್ಲಿಗೆ ರಾಜ್ಯದ ನಾನಾ ಭಾಗಗಳಿಂದ ನೇರ ಬಸ್ ಸೌಕರ್ಯವಿದೆ.

ಮುಖಪುಟ /ನಮ್ಮದೇವಾಲಯಗಳು